Цонхны резин буюу жийргэвч бол цонхны хамгийн жижиг мөртлөө хамгийн их ачаалал үүрдэг хэсэг. Цонхоо хаах бүрт шахагдаж, өвөл тачигнасан хүйтэнд, зун хурц нарны туяанд байнга өртдөг тул цаг хугацааны явцад уян чанараа алддаг. Резин муудсаныг цагт нь анзаарвал цонхоо бүхэлд нь солихгүйгээр дулаан алдалтаа багасгах боломжтой.
Резин ямар үүрэгтэй вэ?
Резин нь хүрээ ба нээгддэг хэсэг буюу салааны хоорондох завсрыг битүүмжилж, хаалттай цонхыг нэг цул бүтэц шиг ажиллуулдаг.
Дулаан хадгална
Хүйтэн агаар завсраар нэвтрэхээс сэргийлж, өрөөний дулааныг алдагдуулахгүй.
Салхи, тоосыг хаана
Хаврын шороон шуурга, тоосонцор цонхны завсраар орохыг хязгаарлана.
Чимээ бууруулна
Битүүмжлэл сайн бол гудамжны дуу чимээ мэдэгдэхүйц багасна.
Чийгнээс хамгаална
Бороо, хайлсан цасны ус хүрээ рүү нэвчихээс сэргийлнэ.
Резин яагаад муудадаг вэ?
Резин бол «мөнхийн» эд анги биш. Түүний эдэлгээг богиносгодог гол шалтгаанууд:
- Хэт ягаан туяа — нарны шууд тусгалд удаан байх тусам резин хатуурч, гадаргуу нь хагардаг.
- Температурын огцом хэлбэлзэл — өвлийн −30°C-аас зуны халуун хүртэлх зөрүү материалыг байнга агшааж, тэлүүлдэг.
- Арчилгаа дутмаг — тоос шороо, тосолгоогүй байдал резины уян чанарыг хурдан алдагдуулна.
- Буруу цэвэрлэгээ — уусгагч, хүчтэй химийн бодис резиныг хатааж, хэврэг болгодог.
- Хэт чанга хавчилт — жилийн турш «өвлийн» горимд байлгавал резин байнга шахагдаж, хэлбэрээ алддаг.
Резин муудсаны 6 шинж тэмдэг
- 1
Хатуурч, уян чанараа алдсан
Хуруугаараа дарахад буцаж тэлэхгүй, хуванцар мэт хатуу болсон бол резин хуучирсан байна.
- 2
Хагарал, тасархай гарсан
Ялангуяа салааны булангуудад нарийн ан цав, тасархай үүссэн эсэхийг анхааралтай харна уу.
- 3
Ховилоосоо мултарсан
Резин байрнаасаа гарч унжих, эсвэл хумигдаж үрчийсэн бол битүүмжлэл алдагдсан гэсэн үг.
- 4
Хаалттай цонхоор салхи сийгэх
Салхитай өдөр цонхны ирмэгт гараа ойртуулахад хүйтэн урсгал мэдрэгдвэл резинээ шалгах цаг болжээ.
- 5
Ирмэгээр цан, хяруу тогтох
Өвөл салааны ирмэг дагуу цан тогтдог бол дулаан яг тэр хэсгээр алдагдаж байна.
- 6
Гадны чимээ ихэссэн
Өмнө нь нам гүм байсан өрөөнд гудамжны дуу тод сонсогдох болсон нь битүүмжлэл суларсны дохио.
💡 Цонх цантах нь заавал резинтэй холбоотой байдаггүй — өрөөний чийгшил, агааржуулалт ч нөлөөлдөг. Дэлгэрэнгүйг Цонх яагаад цантдаг вэ? нийтлэлээс уншаарай.
Гэртээ шалгах энгийн арга
- 1Нимгэн цаас (A4 хуудас) бэлдэж, салааны завсарт хавчуулаад цонхоо түгжинэ.
- 2Цаасыг зөөлөн татаж үзнэ. Чанга хавчигдсан бол тухайн хэсгийн битүүмжлэл хэвийн байна.
- 3Цаас амархан сугарч байвал тэр хэсэгт резин суларсан эсвэл салааны хавчилт сул байна.
- 4Шалгалтыг салааны дөрвөн тал дээр хэд хэдэн цэгт давтана.
- 5Цаас бүх талдаа сул байвал резинд, зөвхөн нэг талдаа сул байвал фурнитурын тохируулгад асуудал байх магадлалтай.
⚠️ Заримдаа резин хэвийн ч салааны хавчилт сул тохируулагдсанаас салхи ордог. Ийм үед түгжих цэгүүдийг «өвлийн» горимд шилжүүлэхэд л асуудал шийдэгддэг. Энэ талаар түгжээ, бариулын түгээмэл асуудал нийтлэлээс уншина уу.
Резинээ хэзээ солих вэ?
| Нөхцөл байдал | Зөвлөмж |
|---|---|
| Резин уян, зөвхөн бохирдсон | Цэвэрлээд силиконон тосоор арчина |
| Цөөн газар бага зэрэг хатуурсан | Тосолж арчлаад, дараагийн улиралд дахин шалгана |
| Хагарал, тасархай, мултрал илэрсэн | Резиныг бүтнээр нь солино |
| Резин шинэ ч салхи орсоор байгаа | Фурнитурын тохируулга, хүрээний гажилтыг мэргэжилтнээр шалгуулна |
Резины эдэлгээ материалын чанар, нарны туяа, арчилгаанаас ихээхэн хамаардаг. Чанартай EPDM, TPE резин зөв арчилбал ихэвчлэн олон жил эдэлдэг ч жилд 1–2 удаа, ялангуяа өвөл болохын өмнө шалгаж байх нь зүйтэй. Жишээ нь, ROPLASTO 68мм профайлд саарал өнгийн EPDM резин, ADOPEN 80мм профайлд TPE резин хэрэглэгддэг.
Резин солихдоо хуучныг нь ховилоос нь бүтнээр нь сугалж, ховилыг тоос шорооноос сайтар цэвэрлэнэ. Шинэ резиныг булангаас эхлүүлж, сунгаж татахгүйгээр ховил дагуу жигд суулгах нь чухал: татаж суулгасан резин хүйтэнд агшиж, булангуудад завсар гаргадаг. Солисны дараа цаасны тестээр битүүмжлэлээ дахин шалгаарай.
✅ Резинээ цагт нь сольж, жилдээ хэдэн удаа арчилбал цонхны битүүмжлэл сэргэж, дулаан алдалт мэдэгдэхүйц буурдаг. Шинэ резиныг цонхныхоо профайлд тохирох хэмжээ, хэлбэрээр сонгох нь чухал.
Цонхоороо салхи орж байна уу?
Мэргэжилтэн маань резин, фурнитурыг шалгаж, засах уу эсвэл солих уу гэдгийг зөвлөнө.
